Nonne: tre volte mamme, per esperienza, bontà e pazienza

Ghe gera le fameje patriarcali, anche nel mondo dei campi e dei paesi: fameje numerose dove viveva alora ne la stessa casa, i noni e le none dei nostri genitori. Sensa zontarghe zii e cugini, in un insieme sereno e co la corte el selese, sempre pien de picoli che se coreva drio zogando insieme.
Le none che spesso faseva le parone de casa, gera figure importanti, par la custodia e la educassion dei fioi. Le mame le andava sui campi in aiuto ai omani. De solito se tratava de grosse boarie che governava campagne de diversi etari, co stala bestiame e tuto el resto – lo digo par conossensa direta – se andava verso a la ventina de persone. In qualche casa ghe gera la cusina granda dove magnava i omani, e una sala più picola, par i boce e le done, quelo gera el regno de le none.
Dai più picoli che le imbocava insegnandoghe a magnare educatamente, dopo aver dito na orassion: a stare a tavola, a no sporcarse e a lavarse le man prima de andare a tola. Par le fameje grosse co diversi campi da lavorare, alora tuto se faseva a brassi, e anche par questo i se meteva insieme. Go conossuo de le none el “tocasana”, come le mame, in caso de necessità, e tante volte, solo par fare un esempio: quando se malava un picolo, che solitamente dormiva ne la camara dei genitori, spesso ne lo stesso leto. Se de note el pianzeva, el gaveva bisogno de essare rancurà, e so papà no podeva dormire, e a la matina doveva andar a lavorare. Tante volte i lo portava da la nona, che no gaveva impegni e la lo tegneva volentieri.
Se diseva che le none gera tre volte mame, par l’esperiensa, la bontà e la passiensa. Capitàva che el paron comprasse na capagna, al de là del paese, uno dei tosi, co mojere e fioi, passava da quela parte, e la nona che lo gaveva visto nassare restàva in casa vecia.
Go conossua una de ste none che in comune se ciamava Luigia ma tuti la ciamava Gigia  che, par andare a trovare i nevodeti più picoli che gaveva cambià casa, la faseva diese chilometri a piè co le savate (parchè le scarpe gera par la festa e anche le ghe faseva male i cali). Sinque chilometri par andare, e altretanti par tornare. Le strade alora gera de tera e no ghe gera machine in giro nei paesi. Se gera de istà, fora del paese, la caminava descalsa, drio l’orlo de la strada dove ghe gera manco sassi. La bicicleta ancora un lusso, par pochi e quasi solo omani zovani, le done no imparava fassilmente, anche parvìa de le cotole.
A qualche curiosa che ghe domandava parchè la faseva tanta strada, par saludarli e tornare, invesse che magari fermarse là par un par de giorni. La Gigia no voleva disturbare: ghe bastava vedarli e darghe un pochi de basi. El più picolo che se ciamava Rino, e gaveva solo siè mesi, e co la contava che, se nol dormiva el la sentìva apena la meteva i piè su la corte, el tirava le manine verso de ela, la gaveva le lagreme ai oci.